Posible pang isa o dalawang bagyo ang mabuo o pumasok sa Philippine Area of Responsibility (PAR) ngayong Disyembre o bago magtapos ang taong 2025, ayon sa state weather bureau.
Batay sa listahan ng ahensya, ang susunod na mga pangalan ng bagyo ay Wilma at Yasmin.
Ayon sa climatological data, ilan sa mga posibleng bagyong ito ay maaaring pumasok ng PAR ngunit hindi magla-landfall, at tutumbok lamang sa direksiyong silangan bago magtuloy patungong Japan.
May posibilidad din na ang ibang sistema ay pumasok ngunit agad mag-recurve, papalayo sa hilaga o hilagang-silangang bahagi ng bansa bago rin umakyat patungong Japan.
Samantala, ang mga bagyong lalabas patungong Hong Kong ay may tsansang dumaan sa Northern o Central Luzon, habang maaari ring maapektuhan ang Southern Luzon hanggang Northern Visayas ng mga bagyong tatahakin ang direksiyon patungong Vietnam.
Hindi rin inaalis ang posibilidad na maapektuhan ang Southern Visayas hanggang Northern Mindanao ng mga tropical system na magtutuloy patungong Thailand.
