Nasabat ng mga ahente ng Philippine Drug Enforcement Agency (PDEA) Region 9 ang tinatayang P6.8 milyong halaga ng shabu mula sa isang suspek sa isinagawang entrapment operation sa Isabela City, Basilan nitong Linggo ng umaga, Mayo 11.
Kinilala ng mga lokal na opisyal sa Isabela City at ng pamahalaang panlalawigan ng Basilan ang suspek na si Ibnoraba Asamli Saddalani, residente ng Barangay Lawe-Lawe sa bayan ng Lantawan.
Ayon kay PDEA-9 Director Maharani Gadaoni-Tosoc, nahuli agad si Saddalani matapos itong magbenta ng isang kilong shabu sa mga operatiba sa Barangay Port Area, Isabela City.
Nakipagtulungan sa operasyon ang mga tauhan ng Isabela City Police Station at ilang yunit mula sa Police Regional Office-9 sa ilalim ng pamumuno ni Brig. Gen. Roel Rodolfo.
Sinabi ni Gadaoni-Tosoc na sasampahan si Saddalani ng kasong paglabag sa Comprehensive Dangerous Drugs Act of 2002, gamit bilang ebidensya ang nasabat na P6.8 milyong halaga ng ilegal na droga.
