Napatay ang isang lalaki matapos pagbabarilin sa Barangay Poblacion, Carmen, North Cotabato, bandang 7:40 ng gabi kahapon, Biyernes, Abril 4, 2025.
Kinilala ang biktima bilang si Ricky Isla, kilala rin sa alyas na Edty Tinggalong, isang residente ng Sitio Baya, Barangay Kilangan, Pagalungan, Maguindanao del Sur.
Ayon sa mga kaanak ng biktima, habang nakatayo ang lalaki sa gilid ng highway, bigla na lamang dumating ang isang motorsiklo at walang kaabog-abog na pinagbabaril siya ng ilang beses. Dumanas ang biktima ng maraming tama ng bala sa katawan na naging sanhi ng kanyang agarang pagkamatay.
Matapos ang pamamaril, mabilis na pinaharurot ng suspek ang motorsiklo na ginamit nitong sasakyan patungo sa madilim na bahagi ng kalsada.
Agad na kinuha ng pamilya ng biktima ang kanyang katawan upang maibigay ang mga nararapat na paggalang at maisagawa ang libing alinsunod sa mga tradisyunal na Islamic rites.
Patuloy pa rin ang imbestigasyon ng Carmen PNP hinggil sa insidente.
