Lubos na ikinatuwa ni Senadora Imee Marcos ang kumpirmasyong tuloy na tuloy na ang kauna-unahang Bangsamoro Parliamentary Elections sa darating na Oktubre ng taong kasalukuyan.
Kasabay nito, inanunsyo rin ng senadora na opisyal nang ipinagpaliban sa Nobyembre 2026 ang Barangay at Sangguniang Kabataan Elections (BSKE), matapos ang mahabang panahon ng debate at konsultasyon.
Sa kanyang Facebook post, binigyang-diin ni Marcos na sa wakas ay umabot na sa isang malinaw na desisyon ang Kongreso hinggil sa postponement ng BSKE, kasunod ng masusing pag-aaral sa epekto nito.
Samantala, kaugnay naman ng nalalapit na halalan sa Bangsamoro Autonomous Region in Muslim Mindanao (BARMM), sinabi ni Marcos na ang eleksyong ito ay mahalagang hakbang tungo sa ganap na autonomy ng rehiyon. Sa pamamagitan nito, magkakaroon ng pagkakataon ang mga Bangsamoro na demokratikong pumili ng kanilang mga kinatawan sa parliyamento—isang makasaysayang tagumpay para sa rehiyon.
