Pinagbabaril ang dalawang babae habang sakay ng motorsiklo sa Quezon Avenue (Parang Road), Rosary Heights 2, Cotabato City, bandang 3:40 ng hapon ngayong Pebrero 12, 2025.
Ayon sa imbestigasyon, sinundan ng dalawang hindi pa nakikilalang suspek ang mga biktima gamit din ang motorsiklo at pinaputukan sila nang maraming beses.
Agad na isinugod sa Cotabato Regional and Medical Center ang dalawang biktima, ngunit idineklarang patay ang isang 27-anyos na babae na residente ng Bagua 2, Cotabato City.
Sugatan naman ang isa pang biktima, isang may-asawang negosyante mula sa Rosary Heights 12, Cotabato City, na patuloy na ginagamot.
Mabilis na rumesponde ang pulisya sa pangunguna ni PCPT Rustan Deaño, kasama ang CCPO-MPU at MBLT-5. Narekober sa pinangyarihan ng krimen ang ilang basyo ng bala ng kalibre .45 na baril at isang berdeng NMAX Yamaha na motorsiklo.
Patuloy ang imbestigasyon upang matukoy ang motibo sa krimen at mahuli ang mga suspek.
Kasalukuyan ding sinusuri ang mga CCTV sa lugar upang makakuha ng karagdagang ebidensya.
