Isinailalim na sa pangangalaga ng City Social Welfare and Development Office (CSWD) ang dalawang Grade 9 na estudyante ng Basilan National High School matapos ang insidente ng pambubugbog sa kanilang Grade 10 na kamag-aral sa loob mismo ng paaralan noong Hunyo 25, 2025.
Viral online ang video ng insidente kung saan makikitang walang habas na pinagtulungan ng dalawang estudyante ang 15-anyos na biktima.
Ayon sa imbestigasyon ng pulisya, pinilit umano ng mga suspek ang biktima na gawin ang isang bagay na labag sa kanyang kagustuhan — kabilang na rito ang paninigarilyo.
Dahil sa kanilang edad, kakasuhan ang mga sangkot sa ilalim ng Anti-Bullying Act kasabay ng mga probisyon ng Juvenile Justice and Welfare Act na nagbibigay ng karampatang proseso para sa mga menor de edad.
Sa panig ng paaralan, sinabi ng principal na posibleng “katuwaan” lamang ang naging motibo ng mga estudyante sa pananakit — isang bagay na ikinadismaya ng ilang magulang at netizens.
Samantala, agad namang dinala ang biktima sa ospital matapos makaranas ng pagkahilo at pagsusuka, at kalauna’y inilipat sa Zamboanga City upang matiyak ang mas maayos na gamutan.
Bilang tugon, pinaigting na ng mga awtoridad ang seguridad sa paaralan at isinailalim sa mas mahigpit na monitoring ang mga CCTV upang maiwasan ang pag-ulit ng ganitong insidente.
