Dalawang (2) lalaki ang naaresto matapos mahuling aktong nagsasagawa ng pot session sa Roales Street, Rosary Heights 13, dakong alas-5:00 ng hapon ng Sabado, Marso 15, 2025.
Kinilala ang mga suspek na sina Ronie F. Medel, 46 anyos, walang trabaho, at residente ng Rosary Heights 15, at Fahad G. Alamada, 21 anyos, walang trabaho, residente ng Mother Barangay Bagua, Cotabato City. Kapwa itinuturing na High-Value Individuals (HVI).
Ayon sa imbestigasyon, isang concerned citizen ang tumawag sa Police Station 2 upang iulat ang umano’y pot session sa nasabing lugar.
Agad na rumesponde ang mga tauhan ng istasyon na pinamunuan ni PMAJ Teofisto R. Ferrer Jr., kasama ang duty investigator.
Naaktuhan umano ang mga suspek habang sumisinghot ng hinihinalang shabu gamit ang isang improvised glass tooter.
Narekober rin sa lugar ang dalawang disposable lighter na ginamit sa aktibidad.
Ang mga nakuhang drug paraphernalia ay isusumite sa RFU-BARMM para sa laboratory examination at tamang kustodiya.
Kasalukuyang inihahanda ang kasong paglabag sa RA 9165 (Comprehensive Dangerous Drugs Act of 2002) laban sa mga suspek.
