Narekober ng mga residente ang mga bangkay ng tatlong (3) lalaki sa Sitio Palao, Barangay Barira, sa bayan ng Barira, Maguindanao del Norte.
Ayon sa paunang ulat ng militar, ang tatlong nasawi ay sinasabing mga kasapi ng isang teroristang grupo na napatay sa isinagawang military operations ng mga kasundaluhan ng Marines.
Gayunman, mariing pinabulaanan ito ng mga kaanak ng mga nasawi.
Ayon sa kanila, ang tatlong lalaki ay pawang mga inosenteng sibilyan na namumuhay nang payapa at nagsasaka lamang sa nasabing lugar upang buhayin ang kanilang pamilya.
Hindi umano sila konektado sa anumang armadong grupo.
Dahil dito, nananawagan ng hustisya ang mga pamilya ng mga biktima.
Masakit anila ang sinapit ng kanilang mga mahal sa buhay, lalo pa’t pinaniniwalaan nilang sila ay walang kasalanan.
Umaasa silang mabibigyang-linaw ang insidente at mananagot ang sinumang responsable sa pagkamatay ng kanilang mga kamag-anak.
