Limang miyembro ng pamilya ang nasugatan matapos silang pagbabarilin sa isang insidente ng karahasan sa komunidad sa mga barangay Duaminanga at Kalipapa sa Datu Piang at sa Brgy. Lumopog, Nabalawag, SGA BARMM, noong gabi ng Marso 3, 2026.
Ayon sa ulat ng Datu Piang Municipal Police Station, natanggap nila ang tawag ng alarma bandang 11:30 ng gabi, at opisyal na naitala ang insidente sa kanilang report bandang 3:30 ng madaling araw ng Marso 4.
Sa paunang imbestigasyon, ang grupo ng mga suspek na kinabibilangan nina Kumander Sukarno, Abugado, Tameng Salangon Paglas, Fahad Paglas, Derie Paglas, at Mads, na pawang residente ng Brgy. Lumopog, Nabalawag, ang umano’y nagpaulan ng bala sa mga residente gamit ang hindi pa matukoy na uri ng baril.
Ayon sa impormasyon mula sa Police Regional Office ng Bangsamoro Autonomous Region, ang mga sugatan ay sina Yahya, Irene, Rowena, Ramadin, at Haladin, lahat residente ng Brgy. Duaminanga. Kasalukuyan silang ginagamot sa mga ospital sa rehiyon.
Bilang tugon, nakipag-ugnayan ang Chief of Police ng Datu Piang MPS sa 38th Infantry Battalion at 6th Infantry Battalion ng Philippine Army, kasama ang mga barangay officials, upang magpatupad ng checkpoint at maiwasan ang paglala ng sitwasyon.
Patuloy ang imbestigasyon ng mga awtoridad upang matukoy ang buong motibo sa insidente at mapanagot ang mga suspek sa kanilang ginawang krimen.
