Patay ang limang pulis habang tatlo ang sugatan matapos tambangan ang tropa ng 2nd Provincial Mobile Force Company bandang alas-9:10 ng gabi sa Maguindanao Street, Brgy. Mother Poblacion.
Kinilala ang mga nasawi na sina Patrolman Kenneth Perocho, Patrolman Al-Fatah Marohom, Patrolman Amil Bangsa, Patrolman Arsenal Sivih at Patrolman Sayed Ridwan.Sugatan naman sina Police Lieutenant Alfred Gregory, Police Staff Sergeant Adam Kamarudin Kansi at Patrolman Abubakar Lauban.
Batay sa ulat, pauwi na sana ang mga pulis sa Camp Datu Akilan matapos ang kanilang patrol nang pagbabarilin sila ng hindi pa nakikilalang mga suspek.
Agad na isinugod sa IPHO-Maguindanao ang mga sugatang pulis habang dinala rin doon ang mga nasawi.
Kabilang sa mga agarang aksyon ng awtoridad ang pag-secure sa lugar ng insidente, pag-alerto sa mga kalapit na himpilan, at pagsasagawa ng hot pursuit operations laban sa mga tumakas na suspek.
Patuloy ang imbestigasyon ng mga otoridad upang matukoy ang pagkakakilanlan at motibo ng mga salarin.
