Bilang bahagi ng layunin ni Pangulong Ferdinand R. Marcos Jr. na maghatid ng mabilis at makataong serbisyo publiko, muling pinatunayan ng Philippine National Police (PNP) na ang kanilang pangunahing misyon ay ang maglingkod at magligtas ng buhay.
Sa dalawang magkahiwalay na insidente, ipinakita ng mga pulis mula sa Olongapo City at La Trinidad, Benguet ang kanilang mabilis na pagresponde, malasakit, at dedikasyon sa tungkulin.
Sa Olongapo City, agad na rumesponde ang mga pulis sa isang ulat ng batang nalunod sa Suzuki Beach Hotel, Barangay Barretto noong Oktubre 11, 2025. Ang biktima ay isang siyam na taong gulang na bata. Sa tulong ng Barangay Barretto Fire and Rescue (BBFR), agad na isinagawa ang CPR at iba pang paunang lunas, kaya’t muling nabuhay ang bata na kalaunan ay idineklarang ligtas sa James L. Gordon Memorial Hospital.
Samantala, sa La Trinidad, Benguet, pinangunahan ni Police Captain Angeline C. Hombrebueno, ang Commander ng PCP 1, ang mabilis na pagresponde sa isang tawag na may kinalaman sa isang babaeng nawalan ng malay sa Middle Bayabas, Pico. Habang papunta sa lugar, agad niyang ipinag-utos ang pagtawag ng ambulansya, at sa pagdating ng mga medikal na tauhan, nakatulong sila upang magkabawi ang biktima at maisugod ito sa Benguet General Hospital. Bago umalis, tiniyak pa ni PCPT Hombrebueno na maayos na ang kalagayan ng babae at naabisuhan na ang pamilya nito.
Pinuri ni Acting Chief PNP Police Lieutenant General Jose Melencio C. Nartatez Jr. ang mga pulis na nakibahagi sa mga operasyon at sinabi:
“Ang ganitong mga kilos ng malasakit ay nagpapaalala sa atin na ang pagiging pulis ay hindi lamang tungkol sa paglaban sa krimen, kundi sa pangangalaga ng buhay. Ang dedikasyon na ipinakita ng ating mga opisyal ay isang halimbawa ng serbisyong nakasentro sa tao, alinsunod sa layunin ng Bagong PNP para sa Bagong Pilipinas: Serbisyong Mabilis, Tapat, at Nararamdaman.”
