Patuloy ang paghina ng natitirang pwersa ng Communist Terrorist Group (CTG) sa Surigao del Sur matapos ang matagumpay na operasyon ng tropa ng 30th Infantry (Fight On) Battalion katuwang ang mga yunit ng intelihensiya sa ilalim ng 901st Infantry Brigade ng 4th Infantry (Diamond) Division, Philippine Army.
Noong Oktubre 11, 2025, narekober ng militar ang ilang matataas na uri ng armas at kagamitang pandigma sa kabundukan ng Barangay Lobo, Cantilan, Surigao del Sur. Kabilang sa mga nakumpiskang kagamitan ay isang Bushmaster 5.56 rifle, isang M16A1 rifle, at isang 40mm grenade launcher. Narekober din ang apat na barrel ng .50 caliber machine gun, ilang landmine, at iba’t ibang klase ng bala at kagamitang militar.
Pinaniniwalaang ang mga ito ay ibinaon ng mga kasapi ng New People’s Army (NPA) upang makaiwas sa tuloy-tuloy na operasyon ng militar sa lugar.
Ang tagumpay sa operasyong ito ay naging posible sa tulong ng mga dating kasapi ng NPA na kusang-loob nang nagbalik-loob sa pamahalaan. Ang impormasyong kanilang ibinahagi—mga dating kasapi ng tinaguriang Sub-Regional Sentro de Gravidad (SRSDG) Westland ng North Eastern Mindanao Regional Committee (NEMRC)—ang nagturo sa mga sundalo sa eksaktong kinaroroonan ng taguan ng armas.
Ayon kay Lt. Col. Albert M. Batingga, Commanding Officer ng 30IB, ang pagkakabawi sa mga matataas na uri ng armas ay isang malinaw na patunay na humihina na ang kakayahang militar ng natitirang CTG sa Caraga Region. “Ang pagkakasamsam sa mga armas na ito ay isa na namang indikasyon na nawawalan na ng kakayahang magsagawa ng opensiba ang kilusang komunista sa rehiyon,” ani Batingga. Dagdag niya, patuloy ang dedikasyon ng kanilang yunit sa pagtatanggol sa mamamayan at pagsusulong ng kapayapaan.
Samantala, pinuri naman ni Major General Michele B. Anayron Jr., Commander ng 4th Infantry (Diamond) Division, ang husay at propesyonalismo ng mga sundalo sa matagumpay na operasyon. Binigyang-diin niya na ang tagumpay na ito ay bunga ng mas pinaigting na intelihensiya at ugnayan ng militar sa mga dating rebelde at lokal na komunidad.
Hinimok rin niya ang mga natitirang kasapi ng CTG na magbalik-loob sa pamahalaan, lumahok sa mga programang pangkapayapaan at pangkaunlaran, at tulungan ang gobyerno sa pagsusulong ng katahimikan at kaunlaran sa Caraga Region. Tiniyak ng pamunuan ng 4ID na mananatili silang tapat sa kanilang misyon na panatilihin ang kapayapaan at seguridad sa rehiyon sa pamamagitan ng walang-humpay na operasyon at pakikipagtulungan sa mga stakeholder.
