Umabot na sa makasaysayang ₱5 bilyon ang kabuuang rehistradong pamumuhunan sa Bangsamoro Autonomous Region in Muslim Mindanao (BARMM) ngayong 2025, na nagbunga ng 2,029 trabaho para sa mga residente sa rehiyon. Inanunsyo ito sa ika-4 na BBOI Board Meeting kung saan inaprubahan ang dalawang bagong proyekto sa Lanao del Sur na muling nagpapatunay sa patuloy na paglakas ng klima sa pamumuhunan sa rehiyon.
Kabilang sa mga ito ang isang Filipino-owned Islamic Bank na itatatag sa Marawi City sa ilalim ng Republic Act No. 11439, na inaasahang lilikha ng 44 trabaho, habang ang isang foreign-owned agriculture at agribusiness project naman sa Amai Manabilang ay naglalayong makapagbigay ng 499 trabaho para sa mga lokal na residente.
Ayon kay BBOI Chairperson Mohamad Omar Pasigan, ang nasabing tagumpay ay sumasalamin sa patuloy na implementasyon ng Economic Jihad—ang estratehikong programa ng BARMM para sa pangmatagalang reporma sa ekonomiya na nakaugat sa Moral Governance at people-centered development. Binigyang-diin niya na ang pag-abot sa ₱5-bilyon na investment mark ay hindi lamang isang rekord kundi malinaw na patunay na ang Economic Jihad ay nagiging buhay na realidad na nagbibigay-kapangyarihan sa mamamayan at nagpapatatag sa ekonomiya ng rehiyon.
Dagdag pa ni Pasigan, ang matatag na pamumuno ni Chief Minister Abdulraof A. Macacua, na nakatuon sa transparency, accountability, at faith-based governance, ang patuloy na nagpapalakas ng tiwala ng mga mamumuhunan at nagtataguyod ng inklusibong paglago sa BARMM. Aniya, sa ilalim ng bisyon ni Chief Minister Macacua na “Mas Matatag na Bangsamoro,” nagsisilbing gabay ang Economic Jihad para sa transformasyon ng rehiyon tungo sa mas mataas na produktibidad, kasarinlan, at pag-unlad na pinangungunahan ng moral na pamumuno.
Batay sa datos ng Philippine Statistics Authority noong Agosto 2025, pumangalawa ang BARMM sa Mindanao sa dami ng approved investments, kasunod ng Davao Region, at kabilang sa nangungunang sampung rehiyon sa buong bansa para sa ikalawang quarter ng taon. Hindi pa kasama sa datos ang mga investment approvals para sa ikatlong quarter at kasalukuyang buwan, na nagpapahiwatig na posibleng mas tumaas pa ang ranggo ng BARMM sa pagtatapos ng taon.
Sa natitirang dalawang buwan bago matapos ang fiscal year, nananatiling optimistiko ang Bangsamoro Board of Investments na magpapatuloy ang investment surge ng rehiyon, dala ng matatag na pamamahala, kompetitibong oportunidad, at aktibong pakikipagtulungan ng pampubliko at pribadong sektor.
Sa huli, binigyang-diin ni Pasigan na sa pamamagitan ng Economic Jihad at Moral Governance, naitatatag ang pundasyon para sa isang matatag at sustenableng ekonomiyang Bangsamoro na tunay na nagbibigay ng patas at konkretong oportunidad para sa lahat ng mamamayan sa rehiyon.
