Bumisita si Pangulong Ferdinand R. Marcos Jr., Commander-in-Chief ng Armed Forces of the Philippines, sa Philippine Air Force (PAF) Mortuary sa Colonel Jesus Villamor Air Base ngayong Nobyembre 7, 2025, upang magbigay-pugay sa mga nasawing airmen ng Super Huey helicopter na bumagsak sa Agusan del Sur habang nagsasagawa ng Rapid Damage Assessment and Needs Analysis (RDANA) matapos ang Bagyong “Tino.”
Dumating si Pangulong Marcos Jr. na sinalubong ni Major General Pablo E. Rustria PAF, Acting Vice Commander ng PAF, kasama ang iba pang senior PAF officers. Personal niyang inabot ang pakikiramay sa mga naulila ng mga namatay na airmen na sina Captain Paulie B. Dumagan PAF at Second Lieutenant Royce Louis G. Camigla PAF, na kasalukuyang nasa PAF Mortuary. Ang mga labi nina Sergeant John Christopher C. Golfo PAF at Airman First Class Ericson R. Merico PAF ay naipadala na sa kani-kanilang mga bayan.
Sa kanyang mapagpakumbabang pagdalaw, nag-alay ng dasal ang Pangulo at pinarangalan ang katapangan at dedikasyon sa tungkulin ng mga namatay na airmen, na handang isakripisyo ang sariling buhay para sa kapakanan ng sambayanan.
Ang pambihirang kabayanihan ng mga airmen, na nakikita sa kanilang walang kapantay na paglilingkod kahit sa panganib, ay sumasalamin sa moto ng kanilang yunit, 505th Search and Rescue Group: “So That Others May Live.” Ang kanilang pamana ay patuloy na magbibigay inspirasyon sa bawat kasapi ng Philippine Air Force na panatilihin ang mataas na pamantayan ng integridad, serbisyo, at kahusayan.
