Nagneutralisa ang tropa ng 93rd Infantry “Bantay Kapayapaan” Battalion ng tatlong miyembro ng Communist NPA Terrorists (CNTs) at nakasamsam ng dalawang armas matapos ang isang sagupaan sa liblib na bahagi ng Barangay Pange, Jaro, Leyte noong Nobyembre 17, 2025.
Tumugon ang mga sundalo sa mga sunod-sunod na ulat ng mga residente hinggil sa presensya ng mga armadong indibidwal na umano’y nananakot at nanggigipit sa mga komunidad. Paglapit pa lamang ng tropa sa lugar ay agad silang pinaputukan, na nauwi sa maikling palitan ng putok.
Umatras ang kalaban at iniwan ang tatlong nasawing CNT na kinilalang sina Fidel Lagado alias “Ivan,” Rogelio Berino alias “Jun,” at Maricel Anora alias “Gani,” pawang miyembro ng IC Levox ng Eastern Visayas Regional Party Committee (EVRPC). Narekober ng militar ang dalawang cal. .45 pistols, mga bala, at ilang personal na gamit. Walang naiulat na kaswalti mula sa hanay ng pamahalaan.
Pinuri ni Major General Adonis Ariel G. Orio, Commander ng 8th Infantry Division, ang pagiging mapagmatyag ng mga residente at binigyang-diin ang tuluy-tuloy na operasyon para mapanatili ang seguridad sa rehiyon. Hinimok din niya ang natitirang CNT members na magbalik-loob at samantalahin ang programang reintegrasyon ng pamahalaan tulad ng National Amnesty Program at E-CLIP.
Nakikipag-ugnayan na ang 8ID sa lokal na pamahalaan ng Jaro upang matunton ang mga pamilya ng nasawing CNT at matiyak ang wastong paghawak at pagpapalibing alinsunod sa International Humanitarian Law (IHL). Patuloy din ang panawagan ng dibisyon sa publiko na iulat ang anumang kahina-hinalang aktibidad upang mapanatili ang kapayapaan sa Eastern Visayas.
