Magsisimula sa ngayong araw, Disyembre 2, ang malaking bawas sa presyo ng diesel at kerosene, habang kaunting dagdag naman ang ipapataw sa gasolina.
Inanunsyo ng Seaoil Philippines na magpapatupad ito ng rollback na P2.90 kada litro para sa diesel at P3.20 kada litro para sa kerosene.
Sa kabilang banda, bahagyang tataas ang presyo ng gasolina ng P0.20 kada litro, kaya’t inaasahang madadagdagan nang kaunti ang gastusin ng mga motorista na gumagamit ng naturang produkto.
Ayon kay Jetti Petroleum president Leo Bellas, ang malaking pagbaba sa diesel ay dulot ng market correction kasabay ng paghinahon ng presyo ng krudo sa pandaigdigang merkado. Ito ay nangyari matapos magkaroon ng panibagong pag-asa sa US-brokered ceasefire sa Ukraine.
Bagama’t bumaba rin nang bahagya ang Asian gasoline benchmarks, iginiit ni Bellas na nananatiling mataas ang premium at freight costs, dahilan upang hindi makasabay ang gasolina sa mas malaking rollback.
Inaasahang makakaapekto ang mga presyong ito sa transportasyon, negosyo, at pang-araw-araw na gastusin ng publiko sa susunod na mga araw.
