Naganap ang sunod-sunod na engkwentro sa pagitan ng mga tropa ng pamahalaan at ng mga miyembro ng New People’s Army (NPA) sa Sitio Mamara, Barangay Cabacao, Abra de Ilog, Occidental Mindoro, nitong Huwebes, Enero 1.
Kasama sa operasyon ang mga sundalo mula sa 76th Infantry (Victrix) Battalion, 1st Infantry (Always First) Battalion, 59th Infantry (Protector) Battalion, at 5th Scout Ranger Battalion, na nakatagpo ang natitirang miyembro ng Komiteng Larangang Gerilya–Island Committee Mindoro (KLG-ICM) ng Southern Tagalog Regional Party Committee. Iniulat na naganap ang tatlong magkakasunod na engkwentro sa loob ng isang araw.
Ayon sa paunang ulat, isang sundalo ang nasugatan, habang ang bilang ng sugatan o nasawi sa panig ng NPA ay hindi pa malinaw.
Kinumpirma ni Colonel Michael Aquino, tagapagsalita ng 2nd Infantry (Jungle Fighter) Division, na naganap ang engkwentro sa kabila ng pansamantalang holiday ceasefire na inanunsyo ng Communist Party of the Philippines (CPP), at may ilang armadong elemento pa rin na aktibo sa lugar.
Patuloy ang mga operasyon upang maiwasan ang muling pagsama-sama ng NPA at masiguro ang kaligtasan ng mga residente. Hinihikayat ang publiko na maging alerto at agad na iulat sa awtoridad ang anumang kahina-hinalang kilos.
Ipinagpapatuloy ang koordinasyon ng militar, lokal na pamahalaan, at kapulisan upang mapanatili ang seguridad sa rehiyon.
