Isang malawakang sunog ang sumiklab sa isang kilalang ski resort sa Crans-Montana, Switzerland, bandang alas-1:30 ng madaling araw noong Enero 1, 2026, na ikinasawi ng humigit-kumulang 40 katao, habang mahigit 115 naman ang naiulat na nasugatan.
Ayon sa mga awtoridad ng Switzerland, kabilang ang Pangulo ng Swiss Confederation na si Guy Parmelin, itinuturing ang insidente bilang isa sa pinakamabibigat na trahedyang naranasan ng bansa sa mga nagdaang taon.
Patuloy pa rin ang proseso ng pagkilala sa mga nasawing biktima, na inaasahang tatagal ng ilang araw dahil sa lawak ng pinsalang idinulot ng sunog. Samantala, ang mga sugatan ay patuloy na ginagamot sa iba’t ibang ospital.
Nagpaabot naman ng pasasalamat ang pamahalaan ng Switzerland sa mga bansang agad na nag-alok ng tulong at suporta para sa mga naapektuhan ng trahedya.
