Naisagawa ang isang joint buy-bust operation ng Philippine Drug Enforcement Agency (PDEA) BARMM na nagresulta sa pag-aresto ng isang Regional Target List (RTL) personality at ng kanyang mga kasabwat, pati na rin sa pagsasara ng isang drug den sa Rosary Heights 11, Cotabato City, nitong Enero 7, 2026.
Pinangunahan ang operasyon ng PDEA Maguindanao del Norte Provincial Office at Land Interdiction Unit, kasama ang suporta mula sa PNP Maritime, Cotabato City Police Office–Criminal Investigation Unit (CCPO-CIU), City Mobile Force Company (CMFC), at Cotabato City Police Office–City Drug Enforcement Unit (CCPO-CDEU).
Ayon sa ulat, apat (4) na indibidwal ang naaresto sa operasyon, kabilang si alias “Kamlon,” 48 taong gulang, na tinukoy bilang isang RTL personality at tagapangalaga ng drug den. Kasama rin sa mga naaresto ang mga sumusunod na patrons: si alias “Abo,” 31 taong gulang, kasal, at isang payong-payong driver mula Malagapas; si alias “Amir,” 40 taong gulang, residente ng Rosary Heights 6; at si alias “Sam,” 49 taong gulang, payong-payong driver mula Rosary Heights 7, Cotabato City.
Narekober mula sa mga suspek ang labing-siyam (19) na piraso ng heat-sealed transparent plastic sachets na naglalaman ng hinihinalang methamphetamine hydrochloride o shabu, na may kabuuang timbang na labing-pito (17) gramo at tinatayang halaga na Php115,600.00. Kasama rin sa nakumpiska ang buy-bust money, isang (1) mobile phone, isang identification card, at iba’t ibang gamit na may kinalaman sa iligal na droga.
Kasalukuyang nasa kustodiya ng PDEA BARMM Jail Facility ang mga naaresto at sila ay kakasuhan sa paglabag sa Republic Act No. 9165, o mas kilala bilang Comprehensive Dangerous Drugs Act of 2002.
