Isang malaking operasyon kontra smuggling ang isinagawa noong gabi ng Enero 10, 2026 sa Barangay Poblacion, Santander, Cebu, sa pangunguna ng PRO7 at koordinasyon ng BIR at iba pang ahensya. Dahil dito, nasamsam ang 200 kahon ng ilegal na ORIS cigarettes, nagkakahalaga ng humigit-kumulang ₱20 milyon, at naaresto ang driver at helper ng shipment. Pinatunayan din na ang ORIS brand ay hindi rehistrado para sa legal na bentahan sa Pilipinas.
Sa kasunod na operasyon noong Enero 11, 2026, dalawang karagdagang indibidwal ang naaresto matapos subukang suhulan ang mga pulis upang ayusin ang kaso. Nasamsam sa kanila ang ₱1 milyon cash, tatlong high-end smartphones, at isang Toyota Fortuner, na kasalukuyang nasa kustodiya ng Regional Special Projects Unit 7 (RSPU7) para sa dokumentasyon at legal na proseso.
Pinuri ni Acting Chief PNP PLTGEN Jose Melencio C. Nartatez Jr. ang mga operatiba sa kanilang dedikasyon, at binigyang-diin ang kahalagahan ng integridad at pagbabantay sa bawat hakbang ng operasyon. Ayon sa kanya, malinaw na ipinapakita ng mga aksyon na hindi matitinag ang PNP sa anumang suhol at tinitiyak nila ang accountability mula seizure hanggang sa kaso.
Dagdag pa niya, bahagi ito ng Enhanced Managing Police Operations (EMPO) sa ilalim ng PNP Focus Agenda, na nakatuon sa intelligence-driven interventions at mahigpit na pagsunod sa proseso. “Hindi lang ito laban sa smuggling, kundi sa lahat ng puwang na sinasamantala ng kriminal na sindikato,” ani Nartatez.
Iginiit din ng PNP na magpapatuloy ang ganitong operasyon sa buong bansa, kasama ang pakikipagtulungan sa ibang ahensya at kooperasyon ng publiko. Hinikayat nila ang mamamayan na maging alerto at i-report ang kahina-hinalang gawain, bilang suporta sa misyon ng Bagong PNP para sa Bagong Pilipinas: Serbisyong Mabilis, Tapat, at Nararamdaman.
