Idineklara ang Enero 21, 2026 bilang regular na non-working holiday sa buong Bangsamoro Autonomous Region in Muslim Mindanao (BARMM) kaugnay ng pagdiriwang ng Bangsamoro Foundation Day, alinsunod sa Bangsamoro Holidays Act (BAA No. 39) at Office of the Chief Minister Proclamation No. 0003, s. 2025.
Layunin ng pagdiriwang na bigyang-pugay ang mahabang pakikibaka at sakripisyo ng mga ninuno ng Bangsamoro, gayundin ang paggunita sa pitong taon ng mga nagawa at tagumpay ng Pamahalaang Bangsamoro mula nang ito ay maitatag.
Inaasahang isasagawa ang iba’t ibang aktibidad sa iba’t ibang bahagi ng rehiyon, kabilang ang makukulay na parada, programang pangkultura, at serbisyong panlipunan na bukas para sa lahat ng mamamayang Bangsamoro. Mayroon ding live coverage upang masubaybayan ng publiko ang mga kaganapan.
Hinihikayat ang mga residente na gamitin ang araw na ito bilang pagkakataon upang magpahinga, magkaisa, at ipagdiwang ang kasaysayan, identidad, at patuloy na pag-unlad ng Bangsamoro, kasabay ng pagpapahalaga sa mga naabot ng pamahalaan sa loob ng pitong taon.
