Hindi pa nakararating sa Pilipinas ang pamilya ng yumaong Nigerian student-athlete na si Chukwuemeka Divine Adili para sa kanyang burol, dahil sa kakulangan sa pinansyal at mga kinakaharap na proseso ng biyahe mula Nigeria.
Sa kasalukuyan, mga kaibigan, kaklase, at kapwa atleta lamang ang nagbabantay sa kanyang labi habang wala pang sinumang kapamilya ang nakararating para sa huling pamamaalam.
Ayon sa mga ulat, nahihirapan ang pamilya ni Adili na tustusan ang gastusin sa paglalakbay patungong Pilipinas, kaya’t patuloy silang hindi nakakadalo sa burol ng kanilang mahal sa buhay.
Si Adili ay dating naglaro para sa New Era University bago lumipat sa Ateneo de Manila University bilang bahagi ng collegiate basketball program.
Habang patuloy ang pagluluksa, nakatuon din ang atensyon sa posibilidad ng pag-uwi ng kanyang labi sa Nigeria upang doon siya mabigyan ng huling paggunita ng kanyang pamilya.
Samantala, maraming netizen at mga kaibigan ang nagpahayag ng pakikiramay at panawagan ng suporta para sa pamilya ni Adili, kasabay ng pag-asang mabigyan sila ng tulong sa gitna ng kanilang matinding pagdadalamhati.
