Naglabas ng public advisory ang Office of the Chief Minister ngayong araw Hunyo 24, 2026 upang paalalahanan ang mga empleyado at kawani ng Bangsamoro Government Center (BGC) na pumasok nang mas maaga sa kanilang karaniwang oras ng trabaho sa Hunyo 25.
Ito ay kaugnay ng nakatakdang Peace Rally na inaasahang magdudulot ng pagdami ng mga sasakyan at pagsisikip ng trapiko sa paligid ng BGC.
Ayon sa advisory, maaaring pansamantalang isara o magpatupad ng traffic restrictions sa Gov. Gutierrez Avenue kapag nagsimula nang magtipon ang mga kalahok ng rally sa lugar. Dahil dito, inaasahang maaapektuhan ang daloy ng trapiko papasok at palabas ng BGC Compound.
Bilang paghahanda, hinikayat ng tanggapan ang lahat ng apektadong indibidwal na planuhin nang maaga ang kanilang biyahe at gumamit ng mga alternatibong ruta upang maiwasan ang pagkaantala.
Pinayuhan din ang publiko na makipagtulungan sa mga traffic management at law enforcement personnel na itatalaga sa lugar upang mapanatili ang kaayusan habang isinasagawa ang aktibidad.
Samantala, nagpahayag ng pasasalamat ang Office of the Chief Minister sa pag-unawa at pakikiisa ng mga mamamayan. Ayon sa tanggapan, layunin ng mga hakbang na ito na matiyak ang maayos na pagdaraos ng Peace Rally habang napapanatili ang tuloy-tuloy na paghahatid ng mga serbisyo ng pamahalaan.
