Natagpuang bangkay ng isang babae ang hindi pa nakikilala sa isang bukirin sa Purok 4, Upper, Barangay Sto. Niño, Talaingod, Davao del Norte nitong umaga ng Hulyo 14, 2026.
Batay sa ulat ng Talaingod Municipal Police Station, bandang 7:30 ng umaga nang rumesponde ang mga pulis matapos makatanggap ng impormasyon hinggil sa pagkakadiskubre ng bangkay sa nasabing lugar.
Ayon sa pulisya, ang biktima ay nasa advance state of decomposition o matagal nang patay bago natagpuan. Nakasuot ito ng pulang T-shirt at madilim na jogging pants nang matagpuan.
Wala ring narekober na anumang pagkakakilanlan o personal na gamit mula sa biktima na makatutulong sa agarang pagtukoy sa kanyang identidad.
Agad na isinailalim sa seguridad ng mga awtoridad ang lugar habang nagsagawa ng paunang imbestigasyon. Patuloy na inaalam ng pulisya ang pagkakakilanlan ng biktima, ang sanhi ng kanyang pagkamatay, at ang mga pangyayaring posibleng may kaugnayan sa insidente.
Nagpapatuloy pa ang imbestigasyon ng mga awtoridad hinggil sa kaso.
