Narekober ng mga tropa ng 30th Infantry Battalion (30IB) at 36th Infantry Battalion (36IB) ang tatlong matataas na kalibre ng baril na pinaniniwalaang itinago ng Communist Terrorist Group (CTG) sa mabundok na bahagi ng Sitio Tubakon, Barangay Bitaugan, San Miguel, Surigao del Sur noong July 13, 2026.
Ayon sa Philippine Army, naisagawa ang operasyon matapos makatanggap ng mapagkakatiwalaang impormasyon mula sa mga dating miyembro ng CTG na boluntaryong nagbalik-loob sa pamahalaan. Dahil dito, natunton at nahukay ng mga sundalo ang mga nakatagong armas.
Sinabi ng militar na bahagi ang naturang operasyon ng patuloy na kampanya upang mabawi ang mga natitirang armas ng mga armadong grupo at maiwasan ang muling pag-usbong ng mga aktibidad ng insurhensiya sa rehiyon.
Ayon kay Lieutenant Colonel Rey Vergel A. Annogui, commanding officer ng 30IB, mahalaga ang pakikipagtulungan ng mga dating rebelde at mga residente sa pagpapanatili ng kapayapaan at seguridad sa komunidad.
Patuloy namang hinihikayat ng Philippine Army ang publiko na magbigay ng mapagkakatiwalaang impormasyon sa mga awtoridad upang makatulong sa mga operasyon at mapanatili ang kapayapaan at kaayusan sa CARAGA Region.
