Umabot sa P138.2 milyon ang ipinamahaging tulong-pinansyal ng pambansang pamahalaan sa 691 barangay sa 27 local government units sa Zamboanga del Norte sa ilalim ng Bawat Barangay Makikinabang Program.
Pinangunahan ni Special Assistant to the President Anton Lagdameo ang seremonyal na pamamahagi noong Oktubre 14, 2026, sa pakikipag-ugnayan sa Office of the Executive Secretary.
Sa ilalim ng programa, bawat barangay ay nakatanggap ng P200,000 mula sa Socio-Civic Project Fund upang suportahan ang edukasyon at mga proyektong pangkomunidad.
Ayon kay Lagdameo, P100,000 sa bawat barangay ang nakalaan para sa educational assistance sa ilalim ng Presidential Scholars program, habang ang natitirang P100,000 ay gagamitin sa mga proyektong tutugon sa pangangailangan ng komunidad.
Sinabi ni Lagdameo na layunin ng programa na mailapit ang tulong ng pamahalaan sa mga mamamayan, matulungan ang mga estudyante at mapalakas ang mga lokal na serbisyo.
Binigyang-diin din niya ang kahalagahan ng pagbibigay sa mga opisyal ng barangay ng pagkakataong tukuyin ang mga prayoridad na proyekto batay sa pangangailangan ng kanilang nasasakupan.
Ayon pa sa opisyal, mahalaga ang pagtutulungan ng pambansa at lokal na pamahalaan upang matiyak na magagamit ang pondo para sa edukasyon, serbisyong pangkomunidad at lokal na kaunlaran.
