Pormal nang nanumpa sa tungkulin si Hon. Junaidin Sampiano Nur, dating Kagawad ng Barangay Dados, bilang bagong Punong Barangay, kasunod ng pagpanaw ng dating punong barangay na si Datu Manalao Mangelen Nur Sr.
Naiulat na nasawi ang 70-anyos na si Datu Manalao Mangelen Nur Sr. matapos pagbabarilin ng hindi pa nakikilalang suspek sa Barangay Saliao, Esperanza, Sultan Kudarat, dakong alas-10 ng umaga noong Oktubre 11, 2026.
Isinugod pa sa ospital ang biktima, subalit hindi na nasagip ang kanyang buhay.
Kasunod ng insidente, kinondena ng lokal na pamahalaan, sa pangunguna ni Mayor Abdulmain Baba Abas, ang naturang pamamaril at nanawagan ng hustisya para sa nasawing opisyal.
Samantala, naging emosyonal ang isinagawang panunumpa ni Nur bilang bagong pinuno ng Barangay Dados.
Dinaluhan ang seremonya ni MLGOO Zacarnain Acmad, kasama ang mga kaanak, kapamilya, at mga kapwa Kagawad na nagpaabot ng kanilang suporta sa kanyang pag-upo sa nasabing posisyon.
Ang paghalili ni Nur sa pamumuno ng barangay ay nagmamarka ng panibagong yugto ng paglilingkod sa gitna ng pagdadalamhati ng komunidad sa pagpanaw ng dating pinuno nito.
Kaakibat ng kanyang panunungkulan ang responsibilidad na ipagpatuloy ang mga programang pangkomunidad at tiyakin ang maayos, tapat, at makabuluhang paglilingkod sa mga residente.
