Naitala ng Bangsamoro Autonomous Region in Muslim Mindanao (BARMM) ang 1.7% inflation rate noong Oktubre, ang pangalawa sa pinakamababa sa bansa, ayon sa Philippine Statistics Authority (PSA) noong Nobyembre 15, 2024.
Bahagyang tumaas ang inflation rate sa buong Pilipinas sa 1.9% ngayong Oktubre mula sa 2.3% noong Setyembre. Sa mga rehiyon, naitala ng Cordillera Autonomous Region (CAR) ang pinakamababang inflation na 1.4%, sinundan ng BARMM sa 1.7%, at Ilocos Region sa 1.9%. Samantala, pinakamataas ang Western Visayas na may 3.9%.
Ayon kay PSA-BARMM Regional Director Engr. Akan Tula, ang bahagyang pagtaas ng inflation rate sa rehiyon ay dulot ng mas mataas na presyo ng pabahay, tubig, kuryente, gas, at iba pang panggatong; pagkain at inuming di-alak; at mga serbisyo sa kainan at akomodasyon.
Kabilang sa limang pangunahing nag-ambag sa pagtaas ng inflation sa rehiyon ay ang renta, full-service na mga restoran, isda at iba pang pagkaing dagat, cereal products, at personal na pangangalaga.
Ipinaliwanag din ni Tula na ang negatibong inflation o pagbaba ng presyo ng mga produkto at serbisyo ay maaaring hindi maganda sa ekonomiya dahil maaaring magdulot ito ng pagkalugi sa mga tagagawa.
Sa mga probinsya ng BARMM, naitala ang pinakamataas na inflation sa Sulu na 3.2%, sinundan ng Maguindanao na 2.2%, Lanao del Sur na 1.9%, Basilan na -0.8%, at Tawi-Tawi na may pinakamababang inflation na -2.0%.
Sa Cotabato City, bahagyang tumaas ang inflation rate sa 3.3% ngayong Oktubre mula 2.9% noong Setyembre. Samantala, ang average inflation rate ng BARMM mula Enero hanggang Oktubre 2024 ay nasa 4.4%.
