Nahuli ng kapulisan ang isang lalaki na may dalang baril sa Datu Odin Sinsuat, Maguindanao del Norte. Kinilala ang nadakip na suspek na si Saiden Buisan, 42-anyos at taga Baryo Poblacion Dalican ng nasabing bayan.
Sa ulat mula sa DOS Police, mayroong isang mamamayan na nagsumbong sa tanggapan nito kaugnay sa isang lalaki na may tama umano ng bala sa paa na nagtatago sa isang tahanan sa Sitio Pangi, Barangay Taviran.
Nang ikasa ng PNP PMFC at ng Barangay Officials ang operasyon, tumambad sa kanila ang mga magasin maging bala ng kalibre 45 na pistola at isang mahabang armas na homemade 12 gauge shotgun.
Sa panayam naman kay DOS Police Investigator PSSgt Benjamin Bido, wala silang nadatnan na sugatang lalaki ngunit nadakip nito agad si Buisan na ngayon ay nasa kustodiya na nito dahil sa mga nakumpiskang armas at bala.
Nakatakas naman ang dalawa pang mga lalaki na posibleng isa sa kanila ang may tama sa paa ng bala ayon sa PNP.
