Natagpuan ang bangkay ng isang babae sa loob ng isang lodging house sa Barangay Magsaysay, Parang, Maguindanao del Norte.
Kinilala ang biktima bilang si Mira Lona Ansinggay, isang residente ng Alamada, Cotabato. Ayon sa inisyal na imbestigasyon, nag-check-in siya sa nasabing establisyemento kasama ang isang hindi pa nakikilalang lalaki.
Makalipas ang ilang oras, napansin ng isang empleyado ang lalaking lumabas mula sa kanilang silid na may dugo sa kamay at paa. Agad itong sumakay sa isang motorsiklo at tumakas.
Dahil sa kahina-hinalang kilos ng lalaki, ipinaalam ng empleyado sa manager ang insidente. Nang kanilang siyasatin ang silid, tumambad ang walang buhay na katawan ni Ansinggay—hubo’t hubad at tadtad ng saksak.
Sa kasalukuyan, patuloy ang imbestigasyon upang matukoy ang pagkakakilanlan ng suspek at alamin ang motibo sa krimen. Hinihikayat din ng mga awtoridad ang publiko na magbigay ng impormasyon upang mapabilis ang paghuli sa salarin.
