Nanawagan si Bayan Muna Chairperson Neri Colmenares sa administrasyong Marcos na gumawa ng malinaw at kongkretong mga hakbang upang maibalik ang Pilipinas bilang kasapi ng International Criminal Court (ICC).
Sa kanyang pahayag, iginiit ni Colmenares na mahalagang muling umanib ang bansa sa ICC, lalo na sa gitna ng nagpapatuloy na preliminary proceedings kaugnay ng mga kasong crimes against humanity laban kay dating Pangulong Rodrigo Duterte.
Ayon kay Colmenares, ipinapakita ng ICC ang patas at layunin nitong pagtugon sa mga seryosong isyu, sa kabila ng mga tangkang ilihis ang imbestigasyon sa pamamagitan ng diversionary tactics.
Dagdag pa niya, ang pagpapatuloy ng mga proseso sa ICC ay dapat magsilbing babala o wake-up call sa kasalukuyang administrasyon upang kilalanin ang kahalagahan ng pananagutan at hustisya.
Binanggit din ni Colmenares na ang pagbabalik ng Pilipinas sa ICC ay isang mahalagang hakbang para bigyang-katarungan ang libu-libong biktima ng extra-judicial killings at ang kanilang mga pamilya.
Giit pa niya, ang ICC ay nagsisilbing mahalagang mekanismo upang matiyak na walang sinumang lider ng estado ang makakaiwas sa pananagutan sa mga matitinding paglabag sa karapatang pantao.
Aniya, ang muling pag-anib ng bansa sa ICC ay hindi lamang para sa international accountability, kundi upang tiyaking protektado rin ang karapatan ng bawat Pilipino.
