Tumama ang isang napakalakas na magnitude 8.8 na lindol sa ilalim ng dagat sa silangang bahagi ng Russia nitong Miyerkules, Hulyo 30, 2025, na agad nagdulot ng tsunami sa mga baybaying bahagi ng Kuril Islands ng Russia at Hokkaido, Japan.
Ayon sa mga seismologist, ang epicenter ng lindol ay naitala sa layong humigit-kumulang 120 kilometro silangan ng Petropavlovsk-Kamchatsky, sa Kamchatka Peninsula.
Agad itong naglabas ng tsunami alerts sa Pacific region, kabilang ang Japan, Alaska, Hawaii, Canada, New Zealand, at maging sa Pilipinas.
Sa Russia, tumama ang mga unang alon sa Kuril Islands, kung saan pansamantalang inilikas ang mga residente.
Ayon sa mga opisyal, walang naiulat na namatay o matinding pinsala sa mga imprastruktura. Naranasan din ang pansamantalang pagkawala ng kuryente at komunikasyon sa ilang bahagi ng Kamchatka.
Sa Japan, naitala ang tsunami waves sa Hokkaido at Iwate Prefecture, kabilang ang:
60 sentimetro sa Hamanaka, Hokkaido
60 sentimetro sa Kuji Port, Iwate
20 sentimetro sa Tokyo Bay
Dahil dito, naglabas ng evacuation advisory ang Japan Meteorological Agency sa mahigit 900,000 katao sa 133 lokalidad mula Hokkaido hanggang Okinawa. Pansamantalang ipinahinto ang ilang ferry at tren, habang isinara rin ang Sendai Airport.
Walang naiulat na abnormalidad sa mga nuclear facilities tulad ng Fukushima Daiichi, subalit pansamantalang inilikas ang libu-libong manggagawa sa mas mataas na lugar bilang pag-iingat.
Naitala rin ang mga aftershock, kabilang ang isang magnitude 6.9 na lindol na kasunod ng pangunahing pagyanig.
Patuloy ang babala ng mga awtoridad hinggil sa posibilidad ng mas matataas na alon lalo na kung sumabay ito sa high tide.
Sa kasalukuyan, wala pang ulat ng pagkasawi sa alinmang bansa, ngunit patuloy ang monitoring ng mga ahensya sa tsunami activity at aftershocks.
