Matagumpay na isinagawa nitong Miyerkules , Abril 9, 2025, ng AFP ang Joint Artillery Littoral Live Fire Exercise sa Barangay Penansaran, Datu Blah Sinsuat, Maguindanao del Norte, ang isang mahalagang bahagi ng Marine Exercise (MAREX) 2025 bilang patunay ng dedikasyon ng AFP sa pagtatanggol ng soberanya ng bansa at pagpapalakas ng kakayahan sa depensa.
Bago ang Live Fire Exercise, matagumpay na isinagawa ng mga kasaping tropa ang Full Mission Profile Amphibious Assault, na nagpapakita ng mahusay na koordinasyon ng Philippine Army, Philippine Navy, at Philippine Marine Corps, pati na rin ng U.S. Marine Corps.
Sa pamamagitan ng mga barko ng Philippine Navy, nagpatuloy ang mga pwersa mula dagat patungong pampang upang magsagawa ng isang makatotohanang senaryo ng labanan.
Ang operasyong ito ay nagpakita ng kahandaan ng AFP na depensahan ang mga baybaying teritoryo ng bansa laban sa mga banta.
Ang pagsasanay ay pinangunahan ni Lt. Gen. Antonio G. Nafarrete PA, Commander ng WestMinCom, kasama ang mga key AFP officers, lokal na opisyal, at mga residente.
Isa sa mga tampok ng pagsasanay ang pagpapaputok ng mga armas tulad ng Elbit Autonomous Truck Mounted Howitzer System at iba pang kalibre ng mga howitzers na nagpakita ng malakas na lakas ng apoy.
Sa kanyang mensahe, binanggit ni Lt. Gen. Nafarrete ang kahanga-hangang pagtatanghal ng mga kalahok at binigyang-diin ang kahalagahan ng MAREX 2025 sa pagpapalakas ng interoperability at seguridad sa rehiyon.
Patuloy na pinapalakas ng AFP ang mga alyansa at kakayahan nito upang tugunan ang mga bagong banta.
