Arestado ang isang 30-anyos na lalaki matapos umanong patayin ang sarili niyang ama sa Sitio Butay, Barangay Tapak, Paquibato District, madaling-araw nitong Oktubre 29.
Kinilala ng pulisya ang biktima na si Emilio Manlangan Manday-onan, 58-anyos, biyudo at miyembro ng tribong Ata. Sa inisyal na imbestigasyon, nakaupo ang biktima sa loob ng kanilang bahay nang lapitan ng suspek, na kanyang anak, at magkaroon ng mainitang pagtatalo na nauwi sa karahasan.
Agad na rumesponde ang Paquibato Police Station matapos makatanggap ng ulat mula sa mga residente. Dinala ang biktima sa punerarya para sa pagsusuri habang inaresto naman ang suspek na hindi na nakapalag.
Ayon sa Davao City Police Office (DCPO), personal na alitan ang nakikitang motibo sa krimen. Napag-alaman din na kamakailan ay humiwalay sa asawa ang suspek at nakitaan umano ng kakaibang kilos bago ang insidente.
Kasalukuyang nasa kustodiya ng pulisya ang suspek at nakatakdang sampahan ng kasong parricide. Patuloy ang imbestigasyon habang nananawagan ang mga awtoridad sa kahalagahan ng maagang pagtugon sa suliraning pangkaisipan at alitan sa loob ng pamilya, lalo na sa mga komunidad na limitado ang access sa serbisyong panlipunan.
