Natagpuan ang isang bagong silang na sanggol sa loob ng isang basurahan malapit sa pasilidad ng Buluan District Hospital sa bayan ng Buluan, Maguindanao del Sur, na agad namang nasagip matapos makarinig ng hindi pangkaraniwang iyak ang mga tao sa paligid ng ospital.
Ayon sa impormasyon, bigla umanong umalingawngaw ang iyak ng isang sanggol, dahilan upang kapwa hospital staff at ilang residente ang magsagawa ng agarang paghahanap. Dito natuklasan ang isang sanggol na lalaki na nakasilid sa itim na plastic bag na puno ng basura—walang saplot, malamig ang katawan, at nakakabit pa ang pusod.
Sa kabutihang-palad, mabilis na naisagawa ang interbensyong medikal at nailagay sa ligtas na kondisyon ang sanggol. Agad din itong isinailalim sa kustodiya ng Municipal Social Welfare and Development para sa agarang proteksyon at pangangalaga.
Samantala, patuloy na tinutugis ng mga awtoridad ang posibleng ina ng sanggol na umano’y nasa hindi matatag na kalagayan ng pag-iisip. Lubhang ikinabigla ng publiko ang pangyayari lalo’t nangyari ito hindi sa liblib na lugar kundi malapit mismo sa pasilidad na simbolo ng buhay, kaligtasan, at pag-asa.
