Habang papalapit ang bagong taon, isang mensahe ng pag-asa at pagbabago ang ipinahatid ni MP Atty. Suharto M. Ambolodto sa mga Persons Deprived of Liberty (PDLs) sa Cotabato City Jail – Male Dormitory. Ayon sa mambabatas, ang panibagong taon ay hindi lamang simpleng pagbabago sa kalendaryo kundi pagkakataon para sa muling pagbabalik-loob at rehabilitasyon ng mga nakakulong.
Binanggit ni Ambolodto na sa ilalim ng Bangsamoro Justice System, ang katarungan ay nakatuon hindi lamang sa parusa kundi sa pagpapanumbalik ng dignidad at pagkakataon para sa pagbabago. Kabilang sa mga programa para sa mga PDL ang BJMP Therapeutic Community Modality Program (TCMP), na nagsisilbing gabay para sa kanilang personal at sosyal na pag-unlad.
Sa pamamagitan ng TCMP, natututo ang mga PDL ng disiplina, pamamahala sa sariling ugali, at mga kasanayan sa bokasyonal at pang-araw-araw na pamumuhay. Kasabay nito, pinapalakas nila ang kanilang kaalaman, pananampalataya, at kakayahang makabuo ng mga ugnayan sa komunidad. Layunin ng programa na ihanda sila hindi lamang para sa pagkakalaya kundi para sa isang dignified na buhay sa hinaharap.
Ayon kay Ambolodto, ang bagong taon ay itinuturing na pagkakataon ng “clean slate,” kung saan maaaring mamulaklak ang mga pagsisikap sa rehabilitasyon. Pinuri rin niya ang mga opisyal ng bilangguan, pinangunahan ni Jail Warden JSUPT Reuben D. Olivo at BJMP-BARMM Regional Director JSSUPT Erwin Kenny P. Ronquillo, sa pagpapatuloy ng mga programang nakatuon sa pagbabago at pagpapanumbalik ng mga PDL.
Binigyang-diin ng mambabatas na ang matagumpay na rehabilitasyon ng isang PDL ay tagumpay ng buong Bangsamoro. Hinikayat niya ang mga PDL na gawing gabay ang TCMP at lakas ang pananampalataya upang baguhin ang kanilang kinabukasan.
