Ipinag-utos ng Ministry of the Interior and Local Government (MILG) ng Bangsamoro Autonomous Region in Muslim Mindanao (BARMM) na hindi muna ipatutupad ang mga preventive suspension orders laban sa ilang Punong Barangay sa Cotabato City kasunod ng nalalapit na 2026 Bangsamoro Parliamentary Elections sa Marso 30, 2026.
Ayon sa Memorandum Order No. 00, Series of 2026, na inilabas ng opisina ni Interim Chief Minister Abdulraof “Sammy Gambar” A. Macacua, kabilang sa mga apektadong opisyal sina Hon. Fidel Dino M. Espino ng Rosary Heights V, Hon. Melissa Faye S. Ayunan ng Rosary Heights XII, Hon. Datu Edris A. Pasawiran ng Kalanganan II, at Hon. Datu Bimbo A. Pasawiran ng Mother Kalanganan.
Ang nasabing mga preventive suspension orders ay unang inisyu ni Mayor Mohammad Ali C. Matabalao at natanggap ng MILG-Cotabato City Field Office noong Enero 5, 2026. Subalit, ayon sa Bangsamoro Local Governance Code of 2023 (Section 74, BARA Act No. 49), ipinagbabawal ang pagpapatupad ng mga suspensyon sa loob ng 90 araw bago ang halalan, mula Disyembre 30, 2025 hanggang Marso 30, 2026. Ang sinumang nasuspinde bago magsimula ang naturang 90-araw na panahon ay itinuturing na awtomatikong naalis ang suspensyon sa simula ng periodong ito.
Dahil dito, iniutos ng MILG sa lahat ng Cotabato City Field Office officials na tumanggi sa anumang kautusan mula sa lokal na pamahalaan na may kinalaman sa pagpapatupad ng preventive suspension sa nasabing Punong Barangay. Ipinabatid din na ang utos na ito ay hindi sumasaklaw sa mga desisyon o resolusyon mula sa ibang tribunal tulad ng Sandiganbayan, Commission on Elections (COMELEC), Ombudsman, Civil Service Commission, o regular courts.
Layunin ng direktiba na panatilihin ang patas at maayos na proseso sa darating na halalan at maiwasan ang anumang abala sa lokal na pamahalaan sa panahon ng eleksyon.
