Ipinahayag ng Bangsamoro Youth Commission (BYC) ang matinding pagkabahala hinggil sa kamakailang online post ng vlogger na si Crist Briand kung saan siya ay humahanap umano ng “baboy na halal.” Ayon sa komisyon, ang naturang pahayag ay hindi lamang mali at mapanlinlang, kundi isa ring malinaw na uri ng kawalang-respeto sa pananampalataya ng mga Muslim.
Binigyang-diin sa liham ng National Commission on Muslim Filipinos (NCMF) – Davao Region na mahigpit na ipinagbabawal sa Islam ang pagkain ng baboy at anumang produktong nagmula rito, sapagkat ito ay itinuturing na haram o bawal. Kaya naman, ang ideyang may “halal na baboy” ay walang batayan, nakaliligaw, at nakasasakit sa damdaming panrelihiyon ng mga Muslim.
Dagdag pa ng BYC, ang mga kabataan ang pangunahing tagasubaybay ng mga vloggers tulad ni Crist Briand, kaya may malaking epekto ang ganitong uri ng nilalaman. Anila, ang mga maling paglalarawan sa pananampalataya—lalo na kung ito ay ginagawang biro o pinababang uri—ay nakapag-aambag sa pagkalat ng maling impormasyon, diskriminasyon, at kakulangan sa pag-unawa sa iba’t ibang kultura.
Dahil dito, nanawagan ang BYC ng direktang paghingi ng tawad mula kay Crist Briand sa buong pamayanang Muslim. Binigyang-diin ng komisyon na ang respeto sa pananampalataya, kultura, at pagkakaiba-iba ay hindi dapat ipinagpapalit o binabale-wala—lalo na sa panahon ng mabilisang pagpapalaganap ng impormasyon sa social media.
Hinimok din ng BYC ang lahat ng content creators at social media influencers na pairalin ang responsibilidad, respeto, at kulturang sensibilidad sa paggawa ng kanilang mga nilalaman. Anila, ang mga pampublikong plataporma ay hindi dapat gamitin upang magpakalat ng maling impormasyon o mga pahayag na makasasakit sa paniniwalang panrelihiyon ng iba.
Sa huli, nanawagan ang komisyon sa publiko—lalo na sa kabataan—na maging mapanuri, magpakita ng paggalang, at isabuhay ang mga pagpapahalaga ng pagkakaunawaan, paggalang sa kapwa, at mapayapang pakikisalamuha sa gitna ng ating pagkakaiba-iba.
