Agad na kumilos ang Bangsamoro Government upang maghanda ng contingency at action plan kasunod ng sunod-sunod na taas presyo ng langis sa rehiyon, dulot ng tensyon sa Gitnang Silangan.
Ayon sa Department of Energy, mula March 24, 2026, tumaas ang presyo ng gasolina ng P6.47 kada litro, diesel ng P11.88, at kerosene ng P13.66 kada litro, kasunod ng mas matataas pang taas noong nakaraang linggo dahil sa pabagu-bagong presyo sa pandaigdigang merkado ng langis.
Inutusan ni Chief Minister Abdulraof Macacua ang lahat ng ministries, offices, at agencies (BMOAs) na magtipon noong March 24–25 upang pagplanuhan ang mga hakbang para mapagaan ang epekto ng mataas na presyo ng langis sa mga komunidad. Kasama sa pagpupulong ang Bangsamoro Disaster Risk Reduction and Management Council (BDRRMC), na nagbigay ng updates sa mga hakbang at contingency plans na naisakatuparan.
Ilan sa mga inilatag na hakbang ng pamahalaan ay fuel subsidies para sa transport groups, libreng sakay para sa mga commuters, at dagdag na tulong sa mga vulnerable sectors tulad ng mga magsasaka at mangingisda. Kasalukuyan ding pinag-aaralan ang pangmatagalang estratehiya para mabawasan ang pagdepende sa imported fuel.
Tiniyak naman ng Ministry of Environment, Natural Resources, and Energy (MENRE) na sapat ang suplay ng gasolina sa rehiyon at pinapayuhan ang publiko na umasa lamang sa opisyal na pahayag para maiwasan ang maling impormasyon tungkol sa kakulangan ng suplay.
Ayon kay Muhammad Farzieh Abutazil, head ng Bangsamoro Rapid Emergency Action on Disaster Incidence (READi), limitado ang kontrol ng pamahalaan sa pandaigdigang presyo ng langis, ngunit nakatuon ang mga awtoridad na maibsan ang epekto sa pang-araw-araw na mamamayan.
Inaasahan ang isang Cabinet meeting ngayong linggo upang pormal na talakayin at aprubahan ang mga intervention plans na inihain ng BMOAs.
