Nagtipon ang matataas na opisyal ng Bangsamoro Government sa ginanap na Executive–Legislative Forum 2026 nitong Lunes upang pagtibayin ang pagkakahanay ng mga plano at batas para sa mas maayos na pamamahala sa Bangsamoro Autonomous Region in Muslim Mindanao (BARMM).
Pinangunahan ang forum nina Abdulraof Macacua at Mohammad Yacob, kung saan pinagsama ang mga lider mula sa ehekutibo at lehislatibo upang pagtugmain ang mga prayoridad at aksyon ng pamahalaan.
Layunin ng inisyatibo na palakasin ang koordinasyon hindi lamang sa loob ng Bangsamoro Government kundi pati na rin sa mga Local Government Units (LGUs), kasabay ng pagsusulong ng transparent at inklusibong pamamahala para sa kaunlaran ng rehiyon.
Ayon kay Macacua, iisa lamang ang nakikita ng mamamayan isang gobyerno na inaasahang kumikilos nang maayos, malinaw, at responsable.
Binigyang-diin din niya na hindi layunin ng kanyang administrasyon na baguhin ang pundasyon ng awtonomiya, kundi lalo itong patatagin sa pamamagitan ng limang haligi: mas matatag na gobyerno, kabuhayan, pamayanan, seguridad, at pananampalataya.
Samantala, sinabi naman ni Yacob na mahalaga ang ugnayan ng Parliament at LGUs, kung saan ang lehislatura ang gumagawa ng mga polisiya habang ang mga lokal na pamahalaan ang nagpapatupad nito sa komunidad.
Iginiit din niya ang kahalagahan ng pananagutan at transparency upang mapanatili ang tiwala ng publiko, pati na rin ang pagbibigay ng sapat na espasyo para marinig ang hinaing at suhestiyon ng mamamayan.
Kabilang sa mga tinalakay sa forum ang pagresponde sa tumataas na presyo ng mga bilihin at langis dulot ng pandaigdigang tensyon. Ayon kay Cabinet Secretary Mohd Asnin Pendatun, bumuo na ng special task force ang pamahalaan upang tugunan ang agarang pangangailangan ng mga apektadong sektor, kabilang ang social amelioration programs at fuel subsidies.
Tinalakay rin sa pagpupulong ang mga mahahalagang panukalang batas, priority codes, at mga patakaran kaugnay ng enerhiya at oil exploration sa rehiyon.
