Inihain ng Korte Suprema ang isang Indirect Contempt matapos umanong mabigong sumunod ang Bangsamoro Transition Authority (BTA) Parliament sa utos ng hukuman na magpasa ng isang balido at konstitusyunal na batas sa redistricting.
Inihain ni Zaoawi A. Buludan ang petisyon, dahil umano sa patuloy na hindi pagkilos ng BTA Parliament sa kabila ng naunang desisyon ng Korte Suprema na nagdeklarang labag sa Saligang Batas ang Bangsamoro Autonomy Act (BAA) Nos. 58 at 77.
Inatasan ng Mataas na Hukuman ang BTA na agarang bumalangkas at magpasa ng bagong redistricting measure na alinsunod sa mga pamantayang konstitusyunal.
Itinuturing na napakahalaga ng redistricting law sapagkat ito ang magsisilbing legal na batayan para sa kauna-unahang Bangsamoro Autonomous Region in Muslim Mindanao (BARMM) Parliamentary Elections na itinakda sa Marso 31, 2026. Kung wala ito, nananatiling hindi tiyak sa aspeto ng batas ang pagsasagawa ng halalan.
Sa kanyang petisyon, hiniling ni Buludan sa Korte Suprema na ipagkaloob ang anumang lunas na itinuturing nitong makatarungan at naaayon sa sitwasyon. Hiniling din niya ang agarang raffle at pagtatalaga ng kaso sa isang partikular na mahistrado o dibisyon, dahil sa pagiging apurahan ng usapin.
Gayunman, mariing itinanggi ni Member of Parliament Atty. Naguib Sinarimbo, isa sa mga respondent, ang mga alegasyon. Inilarawan niya ang petisyon bilang isang uri ng political harassment laban sa mga mambabatas na aktibong nagsulong ng redistricting bill sa antas ng komite.
Ayon kay Sinarimbo, ang mga pinangalanan sa petisyon ay mismong mga mambabatas na nagtulak sa districting bill at dumalo noong Disyembre 19, na itinakdang huling araw ng plenary deliberation at pag-apruba sa panukala.
“Ang mga ito ang mismong mga taong hindi maaaring akusahang tumututol sa redistricting bill,” diin ni Sinarimbo, sabay sabing tiniyak ng mga ito na umabot ang panukala sa antas ng plenaryo at personal na naroon upang mapadali ang pagpasa nito.
Dagdag pa ni Sinarimbo, may depekto umano sa batas ang petisyon dahil piling mga miyembro lamang ng Parliament ang tinarget, gayong ang direktiba ng Korte Suprema ay nakatuon sa BTA Parliament bilang isang kolektibong institusyon, at hindi sa mga indibidwal na mambabatas.
Sinabi rin niya na kung kinakailangan, handa silang ilantad sa publiko ang mga taong tunay na humarang sa committee report, na sa huli ay naging dahilan upang hindi maaprubahan ang redistricting bill.
Inihain ang petisyon noong Enero 5, 2026, habang patuloy ang pagbibilang ng oras patungo sa makasaysayang BARMM parliamentary elections.
