Sinampahan ni Cotabato City Mayor Bruce Matabalao ng kasong dishonesty, misconduct, at gross neglect of duty si City Councilor Hunyn Abu sa Office of the Ombudsman.
Ayon kay Mayor Matabalao, nagsinungaling umano si Abu tungkol sa pagdalo nito sa isang aktibidad ng Philippine Councilors League (PCL) sa Boracay. Dahil dito, hindi raw nakadalo si Abu sa State of the City Address (SOCA) ng alkalde at sa regular session ng konseho.
Subalit, sinabi ni Matabalao na walang rekord o patunay ang PCL na dumalo si Abu sa nasabing aktibidad sa Boracay.
Giit ng alkalde, nagpapakita ng kapabayaan si Abu sa kanyang tungkulin bilang opisyal ng lungsod.
Patuloy namang sinisikap ng 93.7 Star FM Cotabato na makuha ang pahayag ni Councilor Hunyn Abu ukol sa isyung ito.
