Minamadali na ng Department of Agriculture (DA) ang pagsasagawa ng konsultasyon sa iba’t ibang panig ng bansa bilang paghahanda sa malawakang pagbabago sa Rice Tariffication Law (RTL). Layunin ng reporma na mapababa ang presyo ng bigas at matiyak na may sapat na kita ang mga lokal na magsasaka.
Ayon kay Agriculture Secretary Francisco Tiu Laurel Jr., ang mga ginagawang regional consultations, na nakatakdang matapos sa susunod na linggo, ay magsisilbing batayan sa final draft ng mga panukalang amyenda na isusumite sa Kongreso.
Ang inisyatibong ito ay bilang tugon sa direktiba ni Pangulong Ferdinand R. Marcos Jr. na gawing abot-kaya ang bigas para sa publiko habang pinauunlad ang sektor ng agrikultura. Naging mas mabilis ang pag-usad ng reporma matapos ang 2025 Quinta Hearings sa Kongreso, kung saan malawak na sinang-ayunan ng mga mambabatas at stakeholders ang pagbabago sa RTL, na ngayon ay nakapaloob na sa Republic Act No. 12078.
Kabilang ang RTL reform sa 44 prayoridad na panukala ng Legislative-Executive Development Advisory Council (LEDAC) na layong palakasin ang produksyon ng bigas at tiyaking hindi apektado ang kabuhayan ng mga magsasaka sa harap ng pagbabago sa merkado.
