Nasa mabuting kondisyon na si Datu Piang Vice Mayor Mohammad Omar Samama matapos siyang barilin kahapon habang nagtatalumpati sa isang outreach program sa Barangay Magaslong.
Ayon sa kanyang ama, na siya ring alkalde ng bayan na si Mayor Victor Samama, agad na isinugod sa pinakamalapit na ospital ang bise alkalde matapos ang insidente.
Bagamat nasa ligtas nang kalagayan, patuloy pa rin siyang inoobserbahan ng mga doktor.
Sa ngayon, nananatiling hindi pa matukoy ang motibo sa likod ng pamamaril.
Nanawagan naman si Mayor Samama sa kanilang mga tagasuporta na manatiling kalmado at ipaubaya ang imbestigasyon sa mga awtoridad upang maiwasan ang anumang gulo o iba pang maaaring madamay sa insidente.
Patuloy namang nagsasagawa ng masusing imbestigasyon ang mga awtoridad upang matukoy ang nasa likod ng krimen.
