Ipinresenta ng Intel Platoon at Bravo “Brahman” Company ng 38th Infantry “We Clear” Battalion ang tatlong dating miyembro ng Communist Terrorist Group (CTG) at dalawang dating kasapi ng Local Terrorist Group (LTG), kasama ang kanilang mga isinukong armas, kay Lieutenant Colonel Erwin E. Felongco, INF (GSC) PA, Commanding Officer ng 38IB.
Kabilang sa mga isinukong armas ang dalawang (2) homemade M79 grenade launchers, dalawang (2) M1 Carbine rifles, at isang (1) M653 rifle, na may kasamang mga magasin at buhay na bala. Ang mga dating miyembro ng LTG ay kinilalang dating kasapi ng nabuwag na DI-Maguid Group, habang ang mga dating rebelde mula sa CTG ay pawang kasapi ng GF73 (DGF MUSA) FSMR.
Bilang paunang tulong, nagkaloob ang 38th Infantry Battalion ng ayuda sa mga sumukong rebelde, kabilang ang tig-isang sako ng bigas at tulong pinansyal.
Sa kanyang mensahe, pinuri ni LTC Felongco ang naging desisyon ng mga returnees na talikuran ang karahasan at muling yakapin ang mapayapang pamumuhay sa lipunan.
Aniya, “Ang inyong pagbabalik-loob ay hindi lamang tagumpay para sa inyong sarili at pamilya, kundi para rin sa buong komunidad. Patunay ito na posible ang kapayapaan kung pipiliin natin ang diyalogo at pagkakaisa sa halip na labanan. Nananatiling handa ang pamahalaan at ang Hukbong Katihan na suportahan ang inyong bagong simula upang mamuhay kayo nang may kapayapaan, dangal, at seguridad.”
Patuloy namang nananawagan ang 38th Infantry Battalion sa iba pang natitirang miyembro ng CTG at LTG na sumuko na at magbalik-loob sa pamahalaan, sa paniniwalang ang tunay na kapayapaan at pag-unlad ay makakamit lamang sa pagtatapos ng armadong tunggalian at sa pagbabalik sa mapayapang pamumuhay.
