Ang inflation rate ng Bangsamoro Autonomous Region in Muslim Mindanao (BARMM) ay naitala sa 1.3% noong Disyembre 2024, ayon sa Philippine Statistics Authority (PSA)-BARMM.
Ito ang pangalawa sa pinakamababang inflation rate sa buong Pilipinas.
Sa buong bansa, tumaas nang kaunti ang inflation rate sa 2.9% nitong Disyembre mula 2.5% noong Nobyembre.
Ang average inflation rate ng Pilipinas para sa buong taon ay nasa 3.2%, na pasok sa target ng gobyerno na 2% hanggang 4%, ayon sa National Economic and Development Authority (NEDA).
Ang pinakamababang inflation rate ay naitala sa SOCCSKSARGEN (Region XII) na 1.2%. Sumunod ang BARMM at Eastern Visayas (Region VIII) na parehong 1.3%, habang ang CARAGA (Region XIII) ay nasa 1.5%.
Ang pinakamataas naman ay naitala sa Cagayan Valley (Region II) na 4.6%.
Ayon kay PSA-BARMM Regional Director Engr. Akan Tula, ang pagbaba ng inflation rate sa BARMM ay dulot ng mas mababang presyo ng pagkain, inumin, serbisyo sa kainan, at transportasyon.
Dagdag pa niya, kabilang sa mga pangunahing dahilan ng pagbaba ng inflation ang renta sa bahay, presyo ng kuryente, gas, at iba pang fuel, pati na rin ang serbisyo sa personal na pangangalaga.
Sa mga probinsya ng BARMM, ang Tawi-Tawi ang may pinakamababang inflation rate na -0.9%, habang ang Sulu ang may pinakamataas na 2.6%.
Sa kabila ng mababang inflation, ipinaliwanag ni Tula na maaaring magkaroon ito ng negatibong epekto sa ekonomiya kung sobrang baba, dahil maaaring magresulta ito sa pagbaba ng produksyon at pagkawala ng trabaho.
Ang average inflation rate ng BARMM mula Enero hanggang Disyembre 2024 ay 3.9%, na pasok din sa target ng gobyerno at Bangko Sentral ng Pilipinas.
