Walang awang binaril sa harapan ng asawa at anak nito si Police Master Sargeant John Manuel Bongcawil sa parking area ng Citymall Cotabato, Rosary Height 7, Cotabato City kagabi, araw ng Linggo.
Sa inisyal na pagsisiyasat ng kapulisan, papauwi na sana kasama ng pamilya nito at pasakay na ng sasakyan ang nasabing biktima ng bigla itong lapitan ng mga suspek at binaril ito.
Nagkaroon ng tama sa mukha ang biktima na sanhi ng agarang kamatayan nito. Ang mga suspek aniya ay nakaabang na sa pulis upang maisakatuparan ang nasabing krimen.
Narekober sa pinangyarihan ang 12 na basyo ng bala at apat na buhay na bala na mula sa kalibre 45 pistolang baril. Lumutang naman ang anggulo na work related o may kinalaman sa trabaho nito bilang isang intelligence officer ang sanhi ng pagligpit dito.
Sa ngayon, nagsasagawa na ng malalim na pagiimbestiga ang PNP sa lungsod at nagsasagawa na rin ng hot pursuit ang mga autoridad sa nangyaring pagpaslang sa kanilang kabaro na si PMSG Bongcawil.
