Nasawi ang isang lalaki habang dalawa naman ang sugatan matapos mauwi sa pamamaril ang umano’y alitan sa negosyo ng isda sa Sitio Bucana, Purok 4, Mother Barangay Kalanganan, Cotabato City, bandang 10:50 ng gabi noong Pebrero 14, 2026.
Kinilala ang nasawi sa alyas na “Al,” 35 taong gulang, na nagtamo ng mga tama ng bala na naging sanhi ng kanyang agarang pagkamatay. Ayon sa ulat, nag-ugat ang insidente sa hindi pagkakaunawaan kaugnay ng negosyo ng isda sa pagitan ng biktima at mga suspek.
Dalawa pang indibidwal, na kinilalang sina alyas “Ish,” 12 taong gulang, at alyas “Zac,” ang nasugatan matapos madamay sa putukan. Agad silang dinala sa Cotabato Regional and Medical Center (CRMC) upang mabigyan ng karampatang lunas.
Sa isinagawang imbestigasyon, nakilala ang mga suspek na sina alyas “Dats,” 28 taong gulang, na naaresto at nagtamo rin ng tama ng bala, at alyas “Mocs,” na residente ng Barangay Kagawad at kasalukuyang pinaghahanap pa ng mga awtoridad.
Nakarekober ang Scene of the Crime Operatives (SOCO) ng 11 basyo ng bala mula sa 9mm at .45 kalibre sa pinangyarihan ng insidente para sa forensic examination. Nagbigay rin ng seguridad ang pulisya sa ospital habang inihahanda ang pagsasampa ng kaukulang kaso laban sa mga suspek.
Ayon sa Cotabato City Police Office (CCPO), patuloy ang operasyon upang madakip ang natitirang suspek. Tiniyak din ng pamunuan ng pulisya ang kanilang matibay na pangako na maihatid ang hustisya at mapanatili ang kapayapaan at kaayusan sa lungsod.
