Pinangunahan ng mga operatiba mula sa Datu Odin Sinsuat MPS at Provincial Special Operations Group (PSOG) ang isang matagumpay na buy-bust operation laban sa mga ilegal na droga sa Barangay Poblacion 3, Cotabato City, na nagresulta sa pagkakahuli ng isang suspek at kumpiskasyon ng mahigit 170 gramo ng ilegal na droga, na tinatayang may halagang PhP1,156,000.
Ang operasyon ay isinagawa matapos matukoy na ang suspek ay kabilang sa mga High-Value Target (HVT) sa rehiyon, na sangkot sa pagpapakalat ng ilegal na droga. Agad siyang inaresto sa nasabing operasyon at kasalukuyang nakaharap sa mga kasong may kaugnayan sa iligal na droga.
Ayon kay PBGEN Jaysen C. de Guzman, Regional Director ng PRO BAR, ang tagumpay na ito ay patunay ng walang humpay na pagsisikap ng PRO BAR upang sugpuin ang operasyon ng mga sindikato ng droga at alisin ang mga ito sa Bangsamoro region. Aniya, “Patuloy ang ating pagsisikap upang masugpo ang problema sa droga, at ang mga ganitong operasyon ay nagpapakita ng ating dedikasyon sa paglilinis ng ating komunidad.”
Dagdag pa ni de Guzman, “Ang bawat tagumpay na nakamit natin ay isang hakbang patungo sa mas malinis at mas ligtas na komunidad para sa lahat.”
Patuloy ang mga awtoridad sa kanilang operasyon at pangangalap ng impormasyon upang labanan ang ilegal na droga at protektahan ang mga mamamayan mula sa panganib ng narco-terrorism.
