Ipinagdiwang ng 6th Infantry (Kampilan) Division ng Philippine Army ang ika-38 anibersaryo nito sa pamamagitan ng serye ng pre-anniversary activities na nakatuon sa pagpupugay sa mga beterano at paglilingkod sa lokal na komunidad. May temang “6ID @ 38: Tiyak ang Layunin, Matatag na Serbisyo, at Hinubog ng Kapayapaan,” binigyang-diin ng selebrasyon ang patuloy na adhikain ng Division para sa kapayapaan, serbisyo publiko, at nation-building.
Noong October 22, 2025, isinagawa ng 6ID ang “Handog Pasasalamat ng Kampilan” sa Camp Siongco Gymnasium kung saan pinarangalan ang mahigit 190 beterano at kanilang mga pamilya bilang pagkilala sa kanilang sakripisyo at paglilingkod. Tumanggap sila ng libreng serbisyong medikal at dental, konsultasyon, at gamot mula sa Camp Siongco Station Hospital, 1336th Dental Detachment, at mga katuwang na ahensya.
Ipinahayag ni Retired Major David Lagorra, 81 taong gulang na beterano, ang kanyang pasasalamat sa Division sa patuloy na pagkilala sa mga dating sundalo. Ayon naman kay Colonel Ruben G. Aquino, Assistant Division Commander for Reservist and Retirees Affairs, ang aktibidad ay tunay na pagpupugay sa katapangan at dedikasyon ng mga sundalong nag-alay ng buhay para sa kapayapaan ng bansa.
Pinangunahan ni Major General Donald M. Gumiran, Commander ng Western Mindanao Command at 6ID, ang seremonya at nagpaabot ng pasasalamat sa mga beterano, na tinawag niyang haligi ng pundasyong patuloy na pinangangalagaan ng Kampilan Division. Aniya, “Sa ating ika-38 taon, pinararangalan natin ang inyong pamana ng katapangan, integridad, at serbisyo. Kayo ay mananatiling bahagi ng aming pamilyang Kampilan.”
Noong October 20, 2025, nagsagawa rin ang 6ID ng Community Outreach Program sa Awang Elementary School sa pakikipagtulungan ng mga tanggapan ng pamahalaan at pribadong sektor. Tinatayang 350 estudyante at 100 magulang ang nakinabang sa libreng serbisyong pangkalusugan, dental care, school supplies, food packs, at pamamahagi ng bigas.
Nakatuon ang aktibidad sa mga Indigenous People (IP) ng Sitio Lomboy at Sitio Nabilan upang maihatid ang pangunahing serbisyo, palawakin ang inklusibong pamamahala, at palakasin ang ugnayan sa pagitan ng militar at komunidad. Layunin din nitong suportahan ang mga IP families na kabilang sa marginalized sector sa paligid ng Camp Siongco.
Ang programa ay naisakatuparan sa tulong ng mga katuwang na opisyal at organisasyon kabilang sina Governor Tucao Mastura ng Maguindanao del Norte; MP Susana Anayatin ng Office for Settler Communities; MP Romeo Sema; MP Atty. Naguib Sinarimbo; Dr. Kadil Sinolinding Jr. ng Ministry of Health-BARMM; PAFCPIC; AFPSLAI; at ACDI Multi-Purpose Cooperative.
Pinuri ni MP Susana Anayatin ang inisyatiba ng 6ID sa pagpapaabot ng serbisyo sa mamamayan, na kanyang binigyang-diin bilang patunay na ang Army ay hindi lamang tagapagpanatili ng seguridad kundi katuwang din sa pag-angat ng kabuhayan at pagkakaisa ng komunidad.
Sa kanyang pahayag, sinabi ni Maj. Gen. Gumiran na ang outreach program ay sumasalamin sa patuloy na paninindigan ng Division na maglingkod nang lampas sa tungkuling militar. “Kami ay lumalapit sa mamamayan upang patatagin ang ugnayan sa mga taong aming pinanumpaang protektahan. Sa pagdiriwang ng ika-38 anibersaryo ng 6ID, patuloy naming isusulong ang aming misyong maging tagapagtanggol ng kapayapaan at katuwang sa pagpapaunlad ng komunidad.”
